បាត់ដំបង៖ ក្រុមក្មេងស្ទាវចំនួនពីរក្រុមបានឈ្លោះប្រកែកគ្នា ដោយភាគីម្ខាងបានលើកកាំភ្លើងបាញ់ចំនួនជាង ១០គ្រាប់លើភាគីម្ខាងទៀតបណ្តាលក្មេងស្ទាវម្នាក់បានស្លាប់ និង២នាក់ទៀតរងរបួសធ្ងន់ស្រាល។ ហេតុការណ៍នេះបានកើតឡើងនៅវេលាម៉ោងជាង ៣ទាបភ្លឺឈានចូលថ្ងៃទី០៨ ខែធ្នូ ឆ្នាំ២០២២ ក្បែរវេទិកាអុំទូក ស្ថិតនៅក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។

ប្រភពដែលនៅកន្លែងកើតហេតុបានបញ្ជាក់ឱ្យដឹងថា ក្រោយធ្វើសកម្មភាពបាញ់លើក្រុមស្ទាវដែលជាជនរងគ្រោះ ក្រុមជនដៃដល់បានជិះរថយន្តគេចខ្លួនបាត់ស្រមោលតែម្តង។ ជនរងគ្រោះទាំង៣នាក់នោះត្រូវបានដឹកជញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តបាត់ដំបង (ពេទ្យធំ) ដោយក្នុងនោះជនរងគ្រោះម្នាក់ក្នុងចំណោមជនរងគ្រោះ ៣នាក់ បានស្លាប់ពេលបញ្ជូនទៅដល់មន្ទីរពេទ្យ។

តាមប្រភពដដែល បន្ទាប់ពីមានហេតុការណ៍នេះ សមត្ថកិច្ចក្នុងមូលដ្ឋានបានចុះមកប្រមូលវត្ថុតាង និងដាក់កម្លាំងស្រាវជ្រាវស្វែងរកក្រុមជនដៃដល់ដើម្បីយកមកផ្តន្ទាទោសតាមផ្លូវច្បាប់៕